EL CORREO GALLEGO | 09/12/2010

NACEU NUN BAR da rúa do Vilar, no corazón da vella Compostela, e foi aire fresco para unha sociedade que afogaba na travesía da longa noite de pedra. Liderado e dirixido por Agustín Magán até o seu pasamento, en abril do ano 1998, o grupo Ditea sempre se moveu no territorio do teatro aficionado e sempre, tamén, mantivo inalterable o seu compromiso coas montaxes de calidade. Dirixido agora por Alberto Álvarez Escudero, Ditea recibe mañá unha máis que merecida homenaxe do Concello de Santiago. Será un bo momento para aplaudir a traxectoria exemplar de Jesús Reboredo, Rodríguez Míguez ou Mariluz Villar. Uns crac.